ເພີ່ມທະວີ ຄວາມສັກສິດ ແລະ ປະສິດທິຜົນ ໃນການບໍລິຫານ ແລະ ການຄຸ້ມຄອງລັດ-ສັງຄົມ,ສ້າງບາດກ້າວບຸກທະລຸ ອັນໝັກແໜ້ນ ໃນການນໍາພາປະເທດຊາດໃຫ້ຫຼຸດພົ້ນອອກຈາກສະຖານະພາບ ຂອງປະເທດດ້ອຍພັດທະນາ ໃນປີ 2020, ສໍາເລັດຄາດໝາຍສະຫັດສະຫວັດດ້ານການພັດທະນາ (MDGs) ປີ 2015 ແລະ ຈັດຕັ້ງປະຕິບັດແຜນພັດທະ ນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VII ຢ່າງມີໄຊ!

ແຂວງຈຳປາສັກ ສະຫຼຸບຕີລາຄາວຽກງານ ກໍ່ສ້າງຮາກຖານການເມືອງ ປີ 2018 ແລະ ວາງທິດທາງແຜນການ ປີ 2019

ກອງປະຊຸມສະຫຼຸບຕີລາຄາວຽກງານກໍ່ສ້າງຮາກຖານການເມືອງທົ່ວແຂວງຈຳປາສັກ ປີ 2018 ແລະ ວາງທິດທາງແຜນການ ປີ 2019 ໄຂຂຶ້ນໃນຕອນເຊົ້າຂອງວັນທີ 4 ເມສາ ນີ້, ໃຫ້ກຽດເຂົ້າຮ່ວມຂອງທ່ານ ປອ ບຸນຖອງ ດີວິໄຊ ເລຂາພັກແຂວງ ເຈົ້າແຂວງຈຳປາສັກ,ມີບັນດາທ່ານຮອງເລຂາພັກແຂວງ,ຮອງເຈົ້າແຂວງ,ຫົວໜ້າພະແນກການກົມກອງອ້ອມຂ້າງແຂວງ,ນະຄອນ-ເມືອງ,ພະນັກງານຫັນລົງກໍ່ສ້າງຮາກຖານທົ່ວແຂວງເຂົ້າຮ່ວມ.

ໃນໂອກາດກ່າວໄຂກອງປະຊຸມຄັ້ງນີ້,ທ່ານ ສົມສະໜິດ ບຸດຕິວົງ ຮອງເລຂາພັກແຂວງ ຮອງເຈົ້າແຂວງ ຜູ້ຊີ້ນຳວຽກງານກໍ່ສ້າງຮາກຖານຂັ້ນແຂວງ ໄດ້ກ່າວວ່າ: ກອງປະຊຸມສະຫຼູບວຽກງານກໍ່ສ້າງຮາກຖານການເມືອງທົ່ວແຂວງຈໍາປາສັກ ມີຄວາມໝາຍຄວາມສໍາຄັນຢ່າງຍິ່ງ ເຊີ່ງໄດ້ພ້ອມ ກັນສະຫຼຸບ ແລະ ຕີລາຄາຄືນໝາກຜົນ-ຜົນງານໃນການ ເຄື່ອນໄຫວຈັດຕັ້ງປະຕິບັດວຽກງານຮອບດ້ານໃນໄລຍະ01ປີຜ່ານມາ ແລະ ຮ່ວມກັນວາງແຜນ ປັບປຸງວຽກງານຮາກຖານການເມືອງປະຕິບັດວຽກງານຮອບດ້ານຕາມ 4 ເນື້ອໃນ 4 ຄາດໝາຍ ຕິດພັນກັບກອງປະຊຸມໃຫຍ່ 3 ຂັ້ນຂອງພັກໃຫ້ໄດ້ຮັບການຈັດຕັ້ງຜັນຂະຫຍາຍເຂົ້າສູ່ລວງເລີກ ແລະ ລົງສູ່ທ້ອງຖີ່ນຮາກຖານໃຫ້ທົ່ວເຖິງ ເພື່ອໃຫ້ໃສ່ເຮັດໃຫ້ຮາກຖານມີຄວາມແໜ້ນແກ່ນແລະຢືນຍົງເປັນກ້າວໆ.ຈຸດປະສົງຂອງກອງປະຊຸມໃນຄັ້ງນີ້,ແມ່ນ:
- ໄດ້ຮັບຟັງການສະຫຼູບແລະຕີລາຄາຄືນການເຄື່ອນໄຫວວຽກງານຮາກຖານການເມືອງປະຈໍາປີ 2018 ແລະ ຜ່ານທິດທາງແຜນການປີ2019.
- ຮັບຟັງການປະກອບຄໍາຄິດ, ຄໍາເຫັນຂອງຜູ້ແທນກອງປະຊຸມທີ່ມາຈາກພະແນກການ, ກົມກອງອ້ອມຂ້າງແຂວງ, ນະຄອນ, ເມືອງ ແລະ ເປົ້າໝາຍຕ່າງໆ ເພື່ອເປັນການປັບປຸງວຽກງານດັ່ງກ່າວໃຫ້ມີທ່າກ້າວໜ້າຂະຫຍາຍຕົວ.
- ພິເສດກອງປະຊຸມໄດ້ຮັບຟັງການໂອ້ລົມ ແລະຊີ້ທິດເຍືອງທາງຈາກ ທ່ານ ປອ ບຸນຖອງ ດີວິໄຊ ເລຂາພັກແຂວງ ເຈົ້າແຂວງຈຳປາສັກ ເພື່ອເຮັດໃຫ້ວຽກງານກໍ່ສ້າງຮາກຖານການເມືອງມີການເຄື່ອນໄຫວຢ່າງຖືກທິດ ແລະແຂງແຮງກ່ວາເກົ່າ,ເຮັດໃຫ້ພື້ນຖານມີຄວາມສະຫງົບສຸກ,ເປັນລະບຽບຮຽບຮ້ອຍ,ເສດຖະກິດ-ສັງຄົມມີການພັດທະນາ,ມີຊີວິດການເປັນຢູ່ຂອງປະຊາຊົນນັບມື້ດີຂື້ນເລື້ອຍໆ.

ປະຈຸບັນທົ່ວແຂວງຈຳປາສັກມີ 1 ນະຄອນ,9 ຕົວເມືອງ,641 ບ້ານ,68 ກຸ່ມບ້ານ,ມີນາຍບ້ານ ແລະ ຮອງບ້ານ2.490 ຄົນ,ນາຍບ້ານເປັນກຳມະການພຫກເມືອງ 6 ສະຫາຍ. ຜົນສຳເລັດການປະຕິບັດວຽກງານກໍ່ສ້າງຮາກຖານຜ່ານມາ ສ້າງບ້ານພັດທະນາໄດ້ແລ້ວ 565 ບ້ານ,ທຽບໃສ່ 1 ປີຜ່ານມາເພີ່ມ ຂຶ້ນ9 ບ້ານ,ສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍໃນຊົນນະບົດໄດ້ 23 ແຫ່ງ,ເພີ່ມຂື້ນ 3 ບ້ານ,ຄືບ້ານໃໝ່ສິງສຳພັນ ເມືອງຊະນະສົມບູນ,ບ້ານກະດັນ ເມືອງມຸນລະປາໂມກ ແລະບ້ານຫ້ວຍແມ່ສັງເມືອງປະທຸມພອນ,ສ້າງກົມກອງພັດທະນາໄດ້ 186 ກົມກອງ,ເພີ່ມຂື້ນ 15 ກົມກອງ,ລົບລ້າງຄອບຄົວທຸກຍາກຍັງເຫຼືອ 521 ຄອບຄົວ ເທົ່າກັບ 0,4 % ຂອງຈຳນວນຄອບຄົວທັງໝົດໃນທົ່ວແຂວງ.

ເຈົ້າແຂວງເຄື່ອນໄຫວພົບປະອໍານາດການປົກຄອງ ແລະ ປະຊາຊົນບ້ານພັດທະນາຫຼັກເມືອງ

ໃນຕອນບ່າຍຂອງວັນທີ 27 ກັນຍາ 2018, ທ່ານ ບຸນຖອງ ດີວິໄຊ ກໍາມະການສູນກາງພັກ ເລຂາພັກແຂວງ ເຈົ້າແຂວງໆຈໍາປາສັກ ພ້ອມດ້ວຍ ທ່ານ ສຸລິວັນ ສະຫວັດທະສິນ ເຈົ້ານະຄອນປາກເຊ ໄດ້ເຄື່ອນໄຫວພົບປະຢ້ຽມຢາມອໍານາດການປົກຄອງ ແລະ ພໍ່ແມ່ປະຊາຊົນບ້ານພັດທະນາຫຼັກເມືອງ ນະຄອນປາກເຊ.


ການພົບປະຢ້ຽມຢາມຄັ້ງນີ້ ຈັດຂຶ້ນຢູ່ສໍານັກບ້ານພັດທະນາຫຼັກເມືອງ ນະຄອນປາກເຊ, ກ່ອນອື່ນ ທ່ານ ບຸນຖອງ ດີວິໄຊ ກໍາມະການສູນກາງພັກ ເລຂາພັກແຂວງ ເຈົ້າແຂວງໆຈໍາປາສັກ ພ້ອມຄະນະ ໄດ້ຮັບຟັງການລາຍງານສະພາບການນໍາພາ-ຊີ້ນໍາ ແລະ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງບ້ານພັດທະນາຫຼັກເມືອງ ໃນ 6 ເດືອນຕົ້ນປີ 2018 ແລະ ທິດທາງແຜນການໃນ 6 ເດືອນທ້າຍປີ ເຊິ່ງລາຍງານໂດຍ ທ່ານ ຄຳປຸນ ພິລາວົງ ເລຂາໜ່ວຍພັກ ນາຍບ້ານໆພັດທະນາຫຼັກເມືອງ ໂດຍຍົກໃຫ້ເຫັນຂໍ້ສະດວກ ແລະ ຂໍ້ຫຍຸ້ງຍາກໃນການຈັດຕັ້ງປະຕິບັດວຽກງານແຕ່ລະດ້ານ.

ຈາກນັ້ນ ທ່ານ ເລຂາພັກແຂວງ ເຈົ້າແຂວງໆຈໍາປາສັກ ກໍ່ໄດ້ມີຄໍາເຫັນໂອ້ລົມ, ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍອໍານາດການປົກຄອງ ແລະ ພໍ່ແມ່ປະຊາຊົນບ້ານພັດທະນາຫຼັກເມືອງ ທີ່ມີຄວາມສາມັກຄີພ້ອມພຽງກັນຈັດຕັ້ງປະຕິບັດວຽກງານແຕ່ລະດ້ານໃຫ້ມີຜົນສໍາເລັດ. ຕໍ່ມາ ທ່ານ ກໍ່ໄດ້ຍົກໃຫ້ເຫັນສະພາບລວມຂອງແຂວງ,ການປົກປັກຮັກສາ ແລະ ສ້າງສາພັດທະນາປະເທດຊາດ ເວົ້າລວມ, ເວົ້າສະເພາະແມ່ນແຂວງຈໍາປາສັກ ໃນປະຈຸບັນ ເຊິ່ງມີວຽກງານຫຼາຍໆດ້ານໄດ້ມີການປ່ຽນແປງດີຂຶ້ນ ນັບແຕ່ການກໍ່ສາງພື້ນຖານໂຄງລ່າງ, ການຂະຫຍາຍໄຟຟ້າລົງສູ່ຊົນນະບົດ, ການພັດທະນາດ້ານການສຶກສາ, ສາທາລະນະສຸກ ແລະ ການລຶບລ້າງຄວາມທຸກຍາກຂອງປະຊາຊົນ ພ້ອມນີ້ ທ່ານ ກໍ່ໄດ້ຮຽກຮ້ອງໃຫ້ອໍານາດການປົກຄອງບ້ານ ແລະ ພໍ່ແມ່ປະຊາຊົນບ້ານພະບາດ ສືບຕໍ່ເອົາໃຈໃສ່ນໍາພາ-ຊີ້ນໍາ, ສຶກສາອົບຮົມສະມາຊິກລູກບ້ານ ແລະ ລູກຫຼານຂອງຕົນ ໃຫ້ເຄົາລົບລະບຽບກົດໝາຍບ້ານເມືອງ; ສືບຕໍ່ເອົາໃຈໃສ່ຕ້ານ, ສະກັດກັ້ນ ແລະ ແກ້ໄຂບັນດາປາກົດການຫຍໍ້ທໍ້ຕ່າງໆໃນສັງຄົມ ຕົ້ນຕໍແມ່ນບັນຫາຢາເສບຕິດ, ຂີ້ລັກງັດແງະ, ປຸ້ນຈີ້ຊິງຊັບ, ນັກເລງອັນທະພານ, ຂັບຂີ່ລົດໄວ ໃຊ້ສຽງດັງລົບກວນຄົນອື່ນ ແລະ ບັນຫາອຸປັດເຫດຕາມທ້ອງຖະໜົນໃຫ້ຫຼຸດໜ້ອຍຖອຍລົງເທື່ອລະກ້າວ.

ນອກນີ້ ທ່ານ ຍັງໄດ້ເນັ້ນໃຫ້ອໍານາດການປົກຄອງບ້ານ ແລະ ພໍ່ແມ່ປະຊາຊົນ ມີສະຕິລະວັງຕົວຕໍ່ກົນອຸບາຍມ້າງເພທໍາລາຍຂອງສັດຕູ ແລະ ກຸ່ມຄົນທີ່ບໍ່ຫວັງດີ ເຊິ່ງຍາມໃດ ພວກເຂົາກໍ່ໂຄສະນາປັ່ນປ່ວນ, ໃສ່ຮ້າຍປ້າຍສີລະບອບໃໝ່ຂອງພວກເຮົາ. ບັນຫາສຸດທ້າຍ ທ່ານໄດ້ເນັ້ນໃຫ້ສືບຕໍ່ເອົາໃຈໃສ່ການຮັກສາຄວາມສະຫງົບ ແລະ ການຮັກສາອະນາໄມ ຕາມສໍານັກງານຄຸ້ມບ້ານຂອງຕົນ ໃຫ້ຄວາມມີເປັນລະບຽບຮຽບຮ້ອຍ ແລະ ຄວາມສະອາດສວຍງາມ ເພື່ອປະກອບສ່ວນໃນການດຶງດູດນັກທ່ອງທ່ຽວ ທັງພາຍໃນ ແລະ ຕ່າງປະເທດ ໃຫ້ເຂົ້າມາທ່ອງທ່ຽວແຂວງຈໍາປາສັກ ແລະ ນະຄອນປາກເຊ ໃຫ້ນັບມື້ຫຼາຍຂຶ້ນເລື້ອຍໆ.

ທ່ານ ເຈົ້າແຂວງຈຳປາສັກ ຕ້ອນຮັບເອກອັກຄະລັດຖະທູດໄທປະຈຳ ສປປ ລາວ.

ໃນວັນທີ 20 ກັນຍາ 2018 ທ່ານ ບຸນຖອງ ດີວິໄຊ ກຳມະການສູນກາງພັກ ເລຂາພັກແຂວງ ເຈົ້າແຂວງໆຈຳປາສັກ ໃຫ້ກຽດຕ້ອນຮັບການມາຢ້ຽມຢາມ ແລະ ເຮັດວຽກຂອງ ທ່ານ ກຽດຕິຄຸນ ຊາດປະເສີດ ເອກອັກຄະລັດຖະທູດໄທ ປະຈຳ ສປປ ລາວ ພ້ອມພັນລະຍາ ແລະ ຄະນະ ທີ່ຫ້ອງວ່າການປົກຄອງແຂວງຈຳປາສັກ.


ໂອກາດດັ່ງກ່າວ ທ່ານ ບຸນຖອງ ດີວິໄຊ ໄດ້ກ່າວສະແດງຄວາມຍິນດີຕ້ອນຮັບ ພ້ອມທັງຍົກໃຫ້ເຫັນສະພາບການພັດທະນາເສດຖະກິດ-ສັງຄົມ, ວຽກງານການລົງທຶນ ແລະ ທ່າແຮງດ້ານອື່ນໆ ຂອງແຂວງຈຳປາສັກ ໃຫ້ຄະນະຜູ້ແທນຝ່າຍໄທຮັບຮູ້ໂດຍສັງເຂບ ແລະ ສະແດງຄວາມຍ້ອງຍໍຊົມເຊີຍຕໍ່ການຊ່ວຍເຫຼືອຂອງປະຊາຊົນຊາວໄທບໍ່ວ່າຈະເປັນ ວັດຖຸ ແລະ ປັດໄຈຕ່າງໆ ຕໍ່ເຫດການເຂື່ອນໄຟຟ້າເຊປຽນ-ເຊນ້ຳນ້ອຍແຕກ ທີ່ໄດ້ສ້າງຄວາມເສຍຫາຍທັງຊີວິດ ແລະ ຊັບສິນໃຫ້ກັບປະຊາຊົນລາວ ໂດຍສະເພາະແມ່ນເຂດເມືອງສະໜາມໄຊ ແຂວງອັດຕະປື. ພ້ອມທັງຍິນດີອຳນວຍຄວາມສະດວກ ແລະ ໃຫ້ການຮ່ວມມືຕະຫຼອດໄລຍະທີ່ທ່ານເອກອັກຄະລັດຖະທູດໄທ ພ້ອມຄະນະລົງມາຢ້ຽມຢາມ ແລະ ເຮັດວຽກຢູ່ແຂວງຈຳປາສັກ.


ຫຼັງຈາກນັ້ນທ່ານ ກຽດຕິຄຸນ ຊາດປະເສີດ ເອກອັກຄະລັດຖະທູດໄທ ປະຈຳ ສປປ ລາວ ໄດ້ກ່າວສະແດງຄວາມເສຍໃຈຕໍ່ເຫດການເຂື່ອນໄຟຟ້າເຊປຽນ-ເຊນ້ຳນ້ອຍແຕກ ທີ່ສ້າງຄວາມສູນເສຍຢ່າງມະຫາສານ ເຊິ່ງການມາຂອງຄະນະຄັ້ງນີ້ໜຶ່ງແມ່ນເພື່ອມາຢ້ຽມຢາມ ແລະ ສຳຫຼວດຊ່ອງທາງເພື່ອຂະຫຍາຍການຮ່ວມມືດ້ານເສດຖະກິດ-ສັງຄົມ, ການທ່ອງທ່ຽວ ລະຫວ່າງປະເທດໄທກັບ ສປປ ລາວ ເວົ້າລວມເວົ້າສະເພາະແຂວງຈຳປາສັກ ເພື່ອດຶງດູດນັກທ່ອງທ່ຽວ ແລະ ການຄ້າຂາຍທັງສອງຝ່າຍໃຫ້ຫຼາຍຂຶ້ນ. ພ້ອມທັງຍິນດີໃຫ້ການຮ່ວມມື ແລະ ແລກປ່ຽນດ້ານວຽກງານສາທາລະນະສຸກ, ສຶກສາແລະ ການພັດທະນາດ້ານຕ່າງໆຕື່ມອີກ.

ຂ່າວ-ພາບ: ທັດຊະນະ ແສງດາລາ

ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລົງເຄື່ອນໄຫວ ຊີ້ນຳໂຄງການພັດທະນາເຂດ ເສດຖະກິດໃໝ່ສີທັນດອນ ຢູ່ແຂວງຈຳປາສັກ

ໃນຕອນບ່າຍຂອງວັນທີ 25 ກັນຍາ 2018, ຢູ່ທີ່ຫ້ອງວ່າການແຂວງຈຳປາສັກ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ, ປະທານຄະນະກຳມະການສົ່ງເສີມ ແລະ ຄຸ້ມຄອງການລົງທຶນແຫ່ງຊາດ(ຄລທ) ພ້ອມດ້ວຍຄະນະ ໄດ້ມາເຄື່ອນໄຫວ   ເຮັດວຽກຢູ່ແຂວງຈຳປາສັກ ພ້ອມທັງເຄື່ອນໄຫວຕິດຕາມ ຊຸກຍູ້ ຊີ້ນຳໂຄງການພັດທະນາເຂດ ເສດຖະກິດໃໝ່ສີທັນດອນ ເມືອງໂຂງ ແຂວງຈຳປາສັກ ຕ້ອນຮັບໂດຍທ່ານ ບຸນຖອງ ດີວິໄຊ ເຈົ້າແຂວງຈຳາປສັກ ພ້ອມຄະນະນຳຂອງແຂວງ, ເມືອງ, ພະແນກການທີ່ກ່ຽວຂ້ອງ.

ໂອກາດດັ່ງກ່າວ ທ່ານ ລາຕີ ສີສຸພັນນະວົງ ປະທານບໍລິສັດ ຮ່ວມພັດທະນາມະຫານະທີສີທັນນດອນ ຕ່າງໜ້າຜູ້ພັດທະນາໂຄງການເຂດເສດຖະກິດໃໝ່ ສີທັນດອນ ໄດ້ລາຍງານຄວາມຄືບໜ້າໃນໄລຍະທີ1 ຈາກ 6 ໄລຍະການປະຕິບັດໂຄງການ ນັບແຕ່ ມື້ບໍລິສັດໄດ້ເຊັນສັນຍາ ໂຄງການ ເຂດເສດຖະກິດໃໝ່ສີທັນດອນ ນຳລັດຖະບານ ແຫ່ງ ສປປ ລາວ ເຊິ່ງມາຮອດປະຈຸບັນສຳເລັດການມອບຮັບຣີສອດຄອນພະເພັງລະຫວ່າງຜູ້ພັດທະນາ ແລະ ແຂວງຈຳປາສັກ, ການສຳຫຼວດ ແລະ ອອກແບບເສັ້ນທາງອ້ອມດອນໂຂງທີ່ມີຄວາມຍາວ 43 ກິໂລແມັດ ແລະ ທາງລຽບແຄມຂອງ ຈາກຄອນພະເພັງ ຫາ ບ້ານຂີ້ນາກ,  ການສຳຫຼວດແຫຼ່ງທ້ອງທ່ຽວທີ່ສຳຄັນ ໂດຍສະເພາະ ແມ່ນ ຄອນພະເພັງ ແລະ ສົມພະມິດ,  ສຳເລັດການແຕ່າງຕັ້ງຄະນະກຳມະການຊົດເຊີຍຄ່າເສຍຫາຍ ແລະ ຈັດສັນຍົກຍ້າຍທັງລະດັບສູນກາງແລະ ທ້ອງຖິ່ນ.

ໂຄງການພັດທະນາເຂດ ເສດຖະກິດໃໝ່ສີທັນດອນ ເມືອງໂຂງ ແຂວງຈຳປາສັກ ເປັນໂຄງການຮ່ວມທຶນລະ ຫວ່າງນັກລົງທຶນຈາກ ສປ ຈີນ ແລະ ນັກລົງທຶນພາຍໃນຄື: ບໍລິສັດລາວມະຫານະທີສີທັນ ດອນ (ຮົງກົງ) ອິນເວສເມັນ ຈຳກັດ ຮ່ວມກັບບໍລິສັດແອວທີ ວີ ກໍ່ສ້າງຂົວ-ທາງ ເຄຫາສະ ຖານ ແລະ ຊົນລະປະທານ ຈຳ ກັດ ຊຶ່ງມີມູນຄ່າການລົງທຶນ 9 ຕື້ໂດລາ, ການປະຕິບັດໂຄງ ການກໍ່ສ້າງໄດ້ແບ່ງອອກເປັນ 6 ໄລຍະ ເລີ່ມແຕ່ປີ 2018- 2050 ໂດຍມີເປົ້າໝາຍສຳຄັນ ຄື: ຈະສ້າງເມືອງໂຂງໃຫ້ກາຍ ເປັນເມືອງໃໝ່ທີ່ໜ້າທ່ອງທ່ຽວ ການຈັດສັນອອກແບບການ ພັດທະນາຢ່າງເປັນລະບຽບ ສວຍງາມ ໃຫ້ເປັນຕົວແບບ ຂອງການພັດທະນາເສດຖະ ກິດ-ສັງຄົມ ທີ່ເປັນມິດກັບສິ່ງ ແວດລ້ອມ ເພື່ອດຶງດູດການ ທ່ອງທ່ຽວ, ການເຊື່ອມໂຍງກັບ ພາກພື້ນ ແລະ ສາກົນ ເພື່ອ ແນໃສ່ສ້າງສັນຕິພາບ ດຶງດູດ ການລົງທຶນສະໜອງຂໍ້ມູນຂ່າວ ສານໃຫ້ແກ່ນັກລົງທຶນ ຜູ້ປະ ກອບການ ແລະ ນັກທ່ອງທ່ຽວ ຈາກທົ່ວໂລກ ແນໃສ່ເຮັດໃຫ້ ປະຊາຊົນມີລາຍຮັບສູງຂຶ້ນ ຄອບຄົວມີຄວາມເຂັ້ມແຂງ ຕິດພັນກັບການອະນຸລັກຮັກ ສາ ແລະ ສົ່ງເສີມຮີດຄອງປະ ເພນີ ແລະ  ວັດທະນະທຳອັນດີ ງາມຂອງທ້ອງຖິ່ນ ແລະ ຂອງ ຊາດ.

ຕອນທ້າຍ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ ໄດ້ຊີ້ນຳໃຫ້ຫັນເອົາ 17 ກິດຈະການ ທີ່ຈະປະຕິບັດໃນປີ 2018-2025 ເຂົ້າເປັນແຜນວຽກລະອຽດ ແລະ ແຜນກິດຈະການປີ 2019  ອັນທີໜຶ້ງແມ່ນການສ້າງເສັ້ນທາງອ້ອມດອນໂຂງ, ສ່ວນວ່າການຊົດເຊີຍປະຊາຊົນ ແມ່ນໃຫ້ຖຶກຕ້ອງຕາມແນວທາງນະໂຍບາຍຂອງພັກ ແລະ ກົດໜາຍຂອງລັດ.

 

ຂ່າວ-ພາບ: ທັດຊະນະ ແສງດາລາ

ຈຳນວນຜູ້ເຂົ້າຊົມ

92497
ມື້ນີ້:ມື້ນີ້:28
ມື້ວານນີ້:ມື້ວານນີ້:32
ອາທິດນີ້:ອາທິດນີ້:49
ເດືອນນີ້:ເດືອນນີ້:837
ທັງໝົດ:ທັງໝົດ:92497